Fakültə tələbələri Sahibkarlığa Giriş" kursunu uğurla başa vurublar
Bakı Dövlət Universitetinin (BDU) Ekologiya və torpaqşünaslıq fakültəsinin Ekologiya (tədris ingilis dili) ixtisası üzrə III kurs, E009İ qrupunda təhsil alan tələbələr SABAH.HUB-da təşkil olunan "Sahibkarlığa Giriş" kursunu uğurla başa vuraraq startap ekosistemi və biznesin inkişafı sahəsində əhəmiyyətli biliklər əldə etdilər. Tədris müddətində onlar komandaları ilə birlikdə "STAJ" adlı startapı formalaşdıraraq universitet startapları arasında fərqlənməyi bacardılar. Nəticədə, tələbələrimiz UNIVERSITY DEMO DAY müsabiqəsində fakültəmizi və universitetimizi layiqincə təmsil etdilər.
Bu nüfuzlu müsabiqə SABAH.HUB və BAKU ID tərəfindən təşkil olunaraq tələbələrə startap quruculuğu, biznesin böyümə strategiyaları və investorlarla əməkdaşlıq sahəsində geniş biliklər qazandırdı.
Tələbələrimiz üçün bu yalnız bir müsabiqə deyil, sahibkarlıq düşüncəsinin formalaşdığı, praktiki bacarıqların inkişaf etdirildiyi və real biznes mühitində dəyərli təcrübələrin qazanıldığı unudulmaz bir proses oldu. Bu təcrübə onların sahibkarlığın yalnız bir ideyadan ibarət olmadığını, onu düzgün strategiya, əzm və güclü komanda ilə həyata keçirməyin vacibliyini dərindən anlamalarına kömək etdi.
Tələbələrimizin növbəti hədəfi burada qazandıqları bilikləri ekologiya sahəsində tətbiq edərək ekoloji problemlərin həllinə yönəlmiş innovativ startaplar yaratmaqdır. Ətraf mühitin qorunmasına və dayanıqlı inkişafa töhfə vermək məqsədilə onlar ekoloji texnologiyalar və yaşıl iqtisadiyyat sahəsində yeni ideyalar üzərində işləməyə davam edirlər.
