Elmi seminar keçirilmişdir
Bakı Dövlət Universitetinin (BDU) Ekologiya və torpaqşünaslıq fakültəsində Coğrafi ekologiya kafedrasının doktorantı Günel Heydərzadənin “İşğal dövründə Həkəriçay hövzəsinin (Laçın, Qubadlı və Zəngilan rayonlarının ərazilərində) meşə-bitki örtüyündəki dinamik vəziyyətin kəmiyyət və keyfiyyətcə qiymətləndirilməsi” mövzusunda elmi seminar keçirilmişdir.
Seminarda Həkəriçay hövzəsinin ayrı-ayrı rayonları üzrə ekoloji vəziyyətin dinamikası qiymətləndirilib, regional hidroloji rejimlə qarşılıqlı əlaqəsi müəyyənləşdirilib və alınmış nəticələr təqdim olunmuşdur.
Peyk məlumatları əsasında tədqiqat ərazisinin müxtəlif illər üzrə meşə-bitki örtüyü (NDVİ indeksi) və onun əsasında dinamikası müəyyən edilərək, sahə göstəriciləri hesablanmışdır. Bundan əlavə, örtük növləri üzrə artan, azalan və dəyişməyən sahələri əks etdirən təsvirlər, müxtəlif illər üzrə meşə-bitki örtüyü növlərində baş verən dəyişiklikləri əks etdirən xəritələr, tədqiqat ərazisində müxtəlif illərin təsvirlərinin müqayisəsi nəticəsində alınmış dinamika xəritələrinin sahə göstəricilərinə əsasən histoqramı tərtib olunmuşdur. Laçın, Qubadlı və Zəngilan rayonları ərazisinin çay şəbəkəsi və hidroloji vəziyyətin dinamikasını əks etdirən diaqramlar hazırlanıb. Tədqiqat ərazisinin MNDWI su indeksini əks etdirən təsvirlər əldə edilib və onların əsasında dinamika xəritələri tərtib olunmuşdur.
Tədqiqat işində Laçın, Qubadlı və Zəngilan rayonları ərazisinin aerozolluğunun qiymətləndirilməsi aparılıb, NDVİ indeksi təyin olunub, hidroloji vəziyyətdə baş verən dəyişikliklərin meşə-bitki örtüyünə təsiri araşdırılmışdır.
Azərbaycanın cənub-qərb bölgəsində bitki örtüyünün vəziyyətinin araşdırılması çərçivəsində Yer səthinin peyk şəkillərinin emalı əsasında relyef təbəqələri və onun törəmələri, həmçinin NDVI, AFRI və NDWI multispektral indekslərinin qatları daxil olmaqla çoxqatlı elektron xəritə tərtib edilmişdir.
