Dünya Ekoloji Təhsil Gününə həsr olunmuş tədbir
Bakı Dövlət Universiteti (BDU) Ekologiya və torpaqşünaslıq fakültəsinin Tələbə Gənclər Təşkilatının (TGT) təşkilatçılığı ilə 26 yanvar – Dünya Ekoloji Təhsil Gününə həsr olunmuş tədbir keçirilmişdir.
Tədbirdə çıxış edən BDU-nun Coğrafi ekologiya kafedrasının professoru Şövqi Göyçaylı Respublikamızda Ekoloji təhsilin formalaşmasına tarixi baxış etmiş, ekoloji təhsilinin bu günlərə qədərki inkişafındakı mərhələləri izah etmişdir.
Daha sonra fakültənin Ekologiya ixtisası üzrə I kurs tələbəsi Dəniz Zeynallı çıxış edərək, ictimai diqqəti ətraf mühit problemlərinə, onların həllinə yönəltməkdə və gələcəkdə mümkün fəsadların qarşısını almaqda ekoloji təhsilin vacib olduğunu vurğulayıb.
Tədbirin sonunda dekan Akif Ağbabalı Ekologiya və torpaqşünaslıq fakültəsində təhsil alan tələbələrin gələcəkdə olkəmiz və dünya üçün ətraf mühitin mühafizəsi və ekoloji təhsillə bağlı məsələlərdə aparıcı qüvvəyə çevriləcəyinə inamını bildirmişdir.
Qeyd edək ki, müasir ekoloji təhsil hərəkatı 1972-ci ilin iyununda Birləşmiş Millətlər Təşkilatının İsveçin paytaxtı Stokholmda keçirilmiş “İnsanın ətraf mühiti” konfransında beynəlxalq status alıb. Konfransın 21-ci plenar iclasında Stokholm Sazişi imzalanıb. Sazişdə ətraf mühitə və davamlı inkişafa dair 26 prinsip yer alıb. Prinsiplərdən biri “Ətraf mühit üzrə təhsil vacibdir” adlanır.
