Doktorantların və gənc tədqiqatçıların XXVII Respublika elmi konfransında (NASCO XXVII) iştirak edilmişdir
Bakı Dövlət Universitetinin (BDU) Ekologiya və torpaqşünaslıq fakültəsinin Coğrafi ekologiya kafedrasının dissertantı Tahir Yunuslu dekabrın 10-da Elm və Təhsil Nazirliyinin Elm və Ali Təhsil üzrə Dövlət Agentliyi və Sumqayıt Dövlət Universitetinin (SDU) birgə təşkilatçılığı və “SOCAR Polymer” MMC-nin baş sponsorluğu, BP və Nobel Energy şirkətlərinin sponsorluğu ilə SDU-da “Yaşıl dünya naminə həmrəylik ili”nə həsr edilmiş Doktorantların və gənc tədqiqatçıların XXVII Respublika elmi konfransında (NASCO XXVII) iştirak etmişdir.
Tahir Yunuslu konfransın Сoğrafiya, ekologiya və ətraf mühit bölmə iclasında “Palçıq vulkanları qrupu Dövlət təbiət qoruğunun relyefinin təhlili” mövzusunda məruzə ilə çıxış etmişdir.
Məruzə zamanı Palçıq vulkanları qrupu Dövlət təbiət qoruğunun aerokosmik materiallar və peyk təsvirləri əsasında hazırlanmış DEM - Rəqəmsal Yüksəklik Model faylları üzərində ArcGIS, Google Earth proqram təminatları vasitəsi ilə aparılmış relyef analizlərinin nəticələri, analiz nəticələri əsasında hazırlanmış relyef xəritəsi, qoruq ərazisinə daxil olan palçıq vulkanlarının yüksəklik pillələri üzrə paylanması və morfoloji quruluşuna görə növləri haqqında məlumat verilmişdir. Məruzənin sonunda bölmə sədri professor İlham Mərdanov tərəfindən sertifikat təqdim olunmuşdur.
Konfransın açılış mərasimində iştirak edən Elm və Təhsil naziri Emin Əmrullayev çıxışında artıq 27-ci dəfə keçirilən konfransın təşkilinin əhəmiyyətini vurğulayaraq, bu cür tədbirlərin elm sahəsində möhkəm və uğurlu bir ənənə formalaşdırdığını, gənc alimlərə böyük imkanlar yaratdığını qeyd etmişdir.
