Azərcosmosun təşkil etdiyi müsabiqədə iştirak edilib
Bakı Dövlət Universitetinin (BDU) Ekologiya və torpaqşünaslıq fakültəsinin Coğrafi ekologiya kafedrasının dissertantı Tahir Yunuslu Azərbaycan Kosmik Agentliyinin (“Azərkosmos”) təşkil etdiyi “Yer səthinin məsafədən müşahidəsi” müsabiqəsinin finalına vəsiqə qazanaraq təltifetmə mərasimində iştirak etmişdir.
Tahir Yunuslu müsabiqədə “İqlim dəyişgənliyinin Palçıq vulkanları qrupu Dövlət Təbiət Qoruğunun landşaft kompleksliyinə təsirinin tədqiqi” layihəsi ilə istirak edərək finalçılar arasına seçilmişdir. Layihə çərçivəsində Palçıq vulkanları qrupu Dövlət Təbiət Qoruğuna daxil olan 43 palçıq vulkanından 10-nun (Şorbulaq, Gülbəxt-Sarınca, Pilpili Qaradağ, Qaradağ Axtarma, Torpaqlı Axtarma, Otman-Bozdağ, Şahqaya, Çapılmış, Kirdağ, Buransız-Çulğa) yerləşdiyi 488 km2 ərazidə tədqiqat aparılmışdır. Tədqiqat zamanı Azersky/Spot 6, Azersky/Spot 7 peyk təsvirlərindən, Google Earth proqram təminatından əldə edilmiş görüntülərdən, kosmik tədqiqat materialları əsasında hazırlanmış DEM fayllardan istfadə edərək ərazinin yamaclarının baxarlığı, meyillik dərəcələri və qrupları, relyefi, bitki örtüyü ilə örtülmüş ərazilərin, torpaq örtüyünün tərkibinin müəyyən vaxt aralığında illər üzrə dəyişməsi, öyrənilmiş, modellər, cədvəllər və qrafiklər hazırlanmışdır.
Bu il Azərkosmos tərəfindən 8-cisi keçirilən müsabiqənin əsas məqsədi peyk təsvirlərinin və xüsusilə Azersky peykinin arxiv təsvirlərinin istifadəsini əlçatan etmək, ölkə daxilində peyk təsvirləri ilə həyata keçirilən layihələrin inkişafını dəstəkləməkdir.
Bu ilki müsabiqəyə 382 müraciət daxil olmuş, onlardan 255 mövzu təsdiq edilmiş və həmin mövzular əsasında 78 layihə təqdim olunmuşdur. Bu layihələr arasından 52 layihə müsabiqə meyarlarına cavab verərək finala keçmişdir. Müsabiqənin qiymətləndirilməsi zamanı iştirakçıların layihələrinin müxtəlif meyarlara uyğunluğu diqqətlə nəzərə alınmışdır. Bu meyarlar arasında iqlim dəyişikliklərinə qarşı mübarizə, elmi-tədqiqat yönümlülük, innovativlik və kommersiya yönümlülüyü, yəni layihə nəticələrinin real həllərə çevrilmə imkanı kimi vacib meyarlar ön planda olub.
Bu ilki müsabiqənin layihə mövzuları qlobal əhəmiyyət kəsb edən iqlim dəyişikliyinə qarşı mübarizədə kosmik həllərin tətbiqi ilə uyğunluq təşkil etmişdir. Müsabiqənin bu mövzu ilə harmoniya yaratması məqsədilə müraciət edilmiş layihələr arasında kosmik texnologiyalar vasitəsilə iqlim dəyişikliyi və onun təsirləri ilə mübarizə mövzuları əsas götürülmüşdür. Həmçinin, gənclərin elmi fəaliyyətinin stumullaşdırılması məqsədilə qaliblər arasında gənc təqdiqatçıların layihələrinə üstünlük verilmişdir.
Layihələr Azərkosmosun əməkdaşları və müstəqil ekspertlər tərəfindən qiymətləndirilmişdir.
